Paseo micolóxico 2017 (só para asociad@s)

Un ano máis a Sociedade Micolóxica Lucus e a Asociación Cultural Castiñeiro Milenario presentamos unha nova edición do Paseo Micolóxico. A partir das dez da mañá, as persoas asociadas das dúas organizacións imos realizar un paseo micolóxico polas algunhas das fragas do Concello de Begonte, co obxectivo de poder estudar e identificar os cogomelos no seu propio hábitat. Ao mediodía organizaremos unha comida conxunta de confraternidade no local social da Asociación de Veciños de O Castro, cedido de xeito desinteresado para a ocasión. A comida e bebida achegarase por parte de ambas asociacións, aínda que calquera soci@ que o desexe pode aportar voluntariamente algunha preparación para complementar a mesma e compartir cos asistentes.

Programa e horarios aproximados da actividade:
10:00 horas Comezo do paseo micolóxico.
13:30 horas Remate do paseo micolóxico
14:30 horas Xantar
18:00 horas (aproximada) Remate da actividade (aquel soci@ que desexe marchar antes poderá facelo)

A actividade é gratuíta para @s soci@s de ámbalas dúas asociacións, mesmo o xantar correrá a cargo de SMLucus e a A.C. Castiñeiro Milenario.

Advertisements

VI Edición do festival 27273

Toda a información na páxina do Festival 27373

Sesión Vermú e Foliada libre

Despois do Obradoiro de Canto e Pandeireta,temos preparada unha Sesión vermú e foliada libre nas instalacións do Club Fluvial de Begonte. Un xeito lúdico de poñer en práctica o aprendido pola mañá e un xeito de seguir facendo un pouco de festa na xornada do domingo.
Tanto a sesión vermú como a foliada libre está aberta a calquera persoa que se queira achegar ata as instalacións do Club Fluvial de Begonte

Obradoiro de canto e pandeireta: Maneo

O vindeiro domingo, 18 de xuño, contaremos cunha nova actividade relacionada coa música tradicional. Nesta ocasión teremos a posibilidade de asistir a un obradoiro de Canto e Pandeireta, onde se van traballar diferentes técnicas e repertorio de maneo, un xeito de cantar e, sobre todo, de bailar, característico da comarca de Bergantiños.
O encargado de impartilo será Roberto Rodríguez, mestre de canto e percusión da Tradescola en Lugo.
O horario será de 10:30 a 13:00 horas na Casa da Cultura de Begonte, situada no mesmo centro do pobo en plena N-VI.
No noso empeño de colaborar con outras asociacións da provincia, este Obradoiro está organizado pola Tradescola e Castiñeiro Milenario é asociación colaboradora. Deste xeito para inscribirse nos obradoiros ou para recibir mais información pódese contactar coa Tradescola chamando ao tlf 982229966 ou a través do correo electrónico tradescola@gaiteirosgalegos.gal (as prazas son limitadas e de balde).

Actos: Maios e Foliada de Primavera

O sábado 27 de maio imos celebrar a primavera como se merece. Pola tarde sairemos coa rapazada a recoller xestas e fentos e flores para facer un maio ben grande e bonito. Aproveitaremos para coñecer a flora que nos rodea e botar algunha peza arredor do maio. A hora de inicio está programada para ás seis da tarde e sairemos do local Social da Asociación veciñal do Castro (Begonte). A mestra de cerimonias será Branca Villares, que nos vai axudar a facer o maio e botar unhas cantigas relacionadas coa data. Despois repoñeremos forzas cun bo chocolate.

Pola noite, teremos a tradicional Foliada de Primavera con tres grupos convidados: Foliadeir@s do Castro, As Cernellas de Santa María de Bóveda e Raíces do Campo. Ao rematar, Foliada aberta ata ben entrada a noite.

Como sempre agradecer a Branca Villares pola súa implicación neste proxecto. Tamén aos grupos que veñen á Foliada de xeito desinteresado e á Asociación Veciñal do Castro por permitirnos empregar as súas instalacións.

Cata de cervexas galegas e maridaxe 2017

É moi evidente que duns anos para atrás, algo está a mudar no panorama da cervexa en Galicia. A irrupción da cervexa artesá vai paseniño, pero de xeito firme. Na actualidade hai máis de 50 marcas de cervexa en Galicia e só na provincia de Lugo, hai polo menos 11 produtoras de cervexa galega artesá. Este movemento cervexeiro vai pouco a pouco acadando o seu espazo nas rúas, grazas ás feiras que se van organizando, pero tamén nos bares que pouco a pouco van apostando por un produto claramente diferenciado da cervexa comercial. A variedade dentro da cervexa artesá é tan enorme que para iniciarse neste mundo, ás veces, cómpre ter un bo guía, que nos amose esas variedades, que nos aprenda a diferenciar unhas doutras e que incida neses detalles que afastan as cervexas artesás da cervexa típica comercial.

A nós non se nos ocorre mellor guía que Juan Fernández, responsable do templo cervexeiro galego por excelencia: a Cervezoteca Malte na Coruña. Unha persoa que sabe de cervexas, que sabe falar delas e que sabe transmitir a súa paixón por este mundo. Apoiando esta viaxe cervexeira, temos tamén a outro mestre no seu, José Ángel Corral, xerente da Taberna do Labrego en Pacios, Begonte. Unha das referencias gastronómicas da Terra Chá, que vai facer un petisco exclusivo, intentando potenciar os matices de cada cervexa que imos catar.
A cata contará con cinco cervexas e cadanseu petisco e cada cervexa vai ser comentada en profundidade.

As cervexas que formarán parte da cata van ser:

  • Cervexa Nasa Orixinal (Bohemian Pilsner, 5.0%).
  • Cervexa sorpresa, estrea “mundial”. (Cervexa de trigo, 5,4%).
  • In Peccatum Juicy IPA (New England IPA, 6.0%).
  • Santo Cristo Costa Oeste (Imperial IPA, 9.0%).
  • Malte / In Peccatum Black Inverno (Imperial Stout con centeo afumado, café e cacao, 12%).

E os petiscos elaborados especialmente para cada unha serán:

  • Ensalada de verduras con gulas, zume de laranxa e Pedro Ximenez.
  • Navallas con mostaza alioli e naranxa deshidratada.
  • Mexillon e berberechos con sopa de froitos tropicais.
  • Entrecosto de vaca e coulis de froitos vermellos.
  • Tarta tres chocolates con espuma de café e fume de fava tonka.

A data será o 26 de maio e comezará ás nove da noite no local da Taberna do Labrego en Pacios (Begonte, como chegar). O prezo é de 25€ para non socixs e de 20€ para socixs de Castiñeiro Milenario. A cada persoa faráselle entrega dunha guía de cata e dunhas fichas para anotacións.

Debido ao número limitado de prazas é obrigatorio apuntarse no noso correo electrónico (castineiromilenario@hotmail.com) ou chamando por teléfono ao 616 705174, a reserva de prazas farase por rigorosa orde de inscrición.

Como sempre agradecer a Juan Fernández e a José Ángel Corral a súa profesionalidade e o seu interese para que isto saia adiante ano tras ano.

Anterior Entradas máis antigas

%d bloggers like this: