Foliada de Outono 2022: Dando a Lata

¡Estamos de volta cunha nova edición das Foliadas de Outono de Castiñeiro Milenario! Reserva a data do 19 de novembro para achegarte a Begonte e gozar dunha xornada de baile e música tradicional.

Como é tradición, non hai festa foliadeira en Castiñeiro, sen que haxa un momento dedicado á aprendizaxe. Desta volta propoñemos un moi interesante obradoiro de percusión tradicional. O noso ben querido Roberto Rodríguez, impartirá un obradoiro de iniciación ao toque coa Lata de pemento no repertorio de cantares para o baile tradicional. O obradoiro comezará ás sete e media da tarde e terá unha duración aproximada de hora e media e está aberto a calquera persoa que desexe ter un achegamento a este instrumento popular. O custe para persoas non socias é de 15 euros, mentres que para as persoas socias de Castiñeiro Milenario o prezo será de 5€. É aconsellable anotarse se queres asistir enviando un correo a castineiromilenario@hotmail.com, chamando ao 616705174 ou por calquera das nosas redes sociais. Se non tés lata de pemento, a organización tentará de ter latas para todas.

Despois do tempo de formación, pasaremos aos petiscos para repoñer forzas e dar paso aos momentos festeiros coa foliada propiamente dita, que empezará a partir das 22:00, aproximadamente. O grupo local d@s Foliadeir@s do Castro, serán os encargados de romper o xeo e comezar a foliada. Seguidamente intervirán o dúo Gaiteirada desde Lugo e , despois duns anos, volven ás foliadas de Castiñeiro os amigos de Axeigo. Ao remate dos grupos, comezará a foliada aberta.

Agradecemos a Gaiteirada, Axeigo e a Roberto Rodríguez a súa presenza na foliada e, por suposto, á Asociación Veciñal do Castro por deixarnos empregar ás súas instalacións da Casa do Pobo.

Advertisement

A billarda no Terra Chá Xa

Artigo publicado no xornal Terra Chá Xa sobre os equipos que conforman a Conferencia Norleste da Liga Nacional de Billarda

A setas e a rólex

Este fin de semana supuxo un paso máis cara a normalidade e recuperamos os fermosos Paseos Micolóxicos xunto á nosa benquerida Sociedade Micolóxica Lucus pero como somos xente activa e nos presta complicarnos, ademais do paseo tiñamos xornada de billarda na LNB, é dicir, este domingo andamos, como dicía o chiste a setas e a rólex (billardas).

A setas

A xornada comezou ás 10 da mañá na Casa do Pobo do Castro como punto de partida. Dada a prolongada seca deste ano e sospeitando que non habería moitos cogomelos, decidiuse dar o paseo á beira do río pola zona da lagoa do Ollo. Grazas aos ollos expertos dos nosos guías, á súa experiencia e ao seu inmenso coñecemento puidemos identificar algunhas cantas especies e aprender un feixe de cousas sobre os cogomelos e da natureza en xeral. A xornada, como sempre, rematou cun xantar comunitario entre as socias das dúas organizacións.

A rólex

A xornada continuou ás 11 da maña do Campo de Veiga do Olmo en Castroverde. Primeiro chanzo nunha nova edición da Liga Nacional de Billarda e terceira vez que un equipo de Begonte está representado. A xornada foi magnífica, cun campo en perfectas condicións e unha climatoloxía fantástica para que as palanadoras fixesen zoar as billardas polo ceo castroverdés. Unha xornada máis no equipo de Castiñeiro as palanadoras foron maioría e a actuación do equipo foi moi boa, tendo no palán de Pablo Gómez a posibilidade de subir ao caixón dos vencedores por primeira vez na nosa historia; finalmente, o desempate non foi favorable e quedou nunha magnífica quinta posición, a mesma posición que ocupou o equipo.

Para rematar, xuntamos ambas actividades e fixemos un pequeno obradoiro de billarda para membros da SMLucus, algún dos cales dáballe con bastante xeito.

Paseo micolóxico 2022 (só para asociad@s)

Semella que as cousas volven ao rego, paseniño, pero volven. Así que, despois de tres anos, a Sociedade Micolóxica Lucus e a Asociación Cultural Castiñeiro Milenario presentamos unha nova edición do Paseo Micolóxico. No local da Asociación Veciñal do Castro e a partir das dez da mañá do domingo 25 de setembro, as persoas asociadas das dúas organizacións imos realizar un paseo micolóxico por algunhas das fragas do Concello de Begonte, co obxectivo de poder estudar e identificar os cogomelos no seu propio hábitat. Despois deste paseo, organizaremos unha comida conxunta de confraternidade no mesmo local social, cedido de xeito desinteresado para a ocasión. O xantar e a bebida achegarase por parte de ambas asociacións, aínda que calquera soci@ que o desexe pode aportar voluntariamente algunha preparación para complementar a mesma e compartir cos asistentes.

Programa e horarios aproximados da actividade:
10:00 horas Comezo do paseo micolóxico.
13:30 horas Remate do paseo micolóxico.
14:30 horas Xantar comunitario.

O Paseo Micolóxico é unha actividade de balde para @s soci@s de ámbalas dúas asociacións, mesmo o xantar correrá a cargo de SMLucus e a AC Castiñeiro Milenario. O prazo para anotarse remata o xoves 22 de setembro pola tarde e podes facelo mandando un correo a castineiromilenario@hotmail.com ou a través das nosas redes sociais

PD: por problemas alleos a Castiñeiro Milenario aínda non puidemos pasar as cotas do ano 2022, consideraremos soci@s a todas as persoas que xa achegaron a documentación precisa. Probablemente ao principio da semana que vén, se nada se torce de novo, faremos o cargo do recibo correspondente a este ano 2022, desculpade as molestias.

X edición do Festival 27373

A Asociación Cultural Castiñeiro Milenario de Begonte vai organizar a Décima edición do Festival 27373 que terá lugar o sábado 13 de agosto no Club Fluvial de Begonte que presta as súas instalacións para a celebración deste festival.

O Festival 27373 caracterízase por ser o único festival do Concello de Begonte, un dos poucos festivais cunha programación íntegra en Galego, que apoia a grupos emerxentes e que nos últimos anos conta, polo menos, cun grupo integrado maioritariamente por mulleres. Unha aposta pola lingua e pola visibilización da muller nos escenarios.

O Festival está dividido en dúas partes. Polo día, a programación vai dirixida aos máis pequen@s e ás familias. A partir das 14 horas comezará unha atractiva sesión vermú con música tradicional, na que poderemos gozar, en exclusiva, das dúas cervexas oficiais do Festival 27373. Ámbalas dúas cervexas son unha colaboración entre Castiñeiro Milenario e cervexa artesá Aloumiña de Lugo. Xa pola tarde, a partir das cinco, comezará o tradicional X Aberto de Billarda coa colaboración da Asociación O Varal. Ás seis, o II campionato de serrador@s da Terra Cha, o cimbrón volve á programación do Festival. Agardemos que sexa un bo día para pasar ao carón do río, xantando e compartindo sobremesa nunha zona que conta con tódolos servizos, nun entorno de ribeira perfectamente acondicionado e coidado, onde se pode gozar dun baño, xantar nalgunha das mesas ou mesmo no campo e pasear á beira do río ao tempo que participamos nas distintas actividades.

Pola tarde, a partir das seis e media, abrirá o festival Lydia Botana, cun espectáculo didáctico para a cativada e as familias, baixo o nome de Os contos de Alí, a proposta une narración oral, cancións e ilustracións amosadas a través dun kamishibai e pretende contribuír á difusión de recursos lúdicos e educativos en galego. Sempre contan cun plano literal, dirixido á rapazada, e cun plano metafórico que pretende promover a reflexión das nais e pais sobre a súa responsabilidade na transmisión interxeracional do idioma. É por iso que o destinatario é o público familiar.

Despois subirán ao escenario os Maghúa, seis homes que, desde A Coruña, levan máis de 15 anos difundindo a música que as nosas mulleres maiores nos legaron, as súas pandeiretas encherán o torreiro de música tradicional. Logo dos cantareiros, subirá ao escenario, Flow do Toxo, desde O Condado chegan estas catro mulleres, feministas, reivindicativas e un dos grupos referencia do rap en Galego, enerxía e compromiso para o festival. Rematan, desde Teis, Os Vacalouras, que pecharán esta décima edición co seu punk-rock sen concesións, enerxía e festa garantida.

Queremos agradecer a axuda económica da Deputación de Lugo e do Concello de Begonte. Ao Club Fluvial de Begonte por prestar as súas marabillosas instalacións. Ás empresas e organizacións colaboradoras e, por suposto, a Cervexa Artesá Aloumiña, por todas as facilidades para facer de novo as cervexas do festival. Tamén a todas aquelas asociacións culturais, artesáns, e, por suposto, agradecer a presenza de todas as persoas que se acheguen ata Begonte a pasar un día cheo de actividades culturais nun entorno incomparable.

Hemeroteca: Os maios e Foliada de Primavera

Os maios e a Foliada de Primavera na suplemento A Chaira do progreso e na sección xente do mesmo xornal. Agradecer o traballo que o suplemento A Chaira fai por amosar o que se fai na comarca.