Actos: Festival 27373

A V edición do Festival 27373 de Begonte, reúne nun mesmo día, un festival para nenos e nenas durante a mañá e a tarde e concertos para os mozos e mozas pola noite

 A Asociación Cultural Castiñeiro Milenario de Begonte vai organizar a Quinta edición do Festival 27373 que terá lugar o sábado 13 de agosto no Club Fluvial de Begonte que presta as súas instalacións para a celebración deste festival.

O Festival está dividido en dúas partes. Polo día, a programación vai dirixida aos máis pequen@s. A partires das 12:00 comezamos coas actividades deportivas que estarán a cargo da empresa de Begonte Non Estreses, que vai ofrecer paseos en canoa pola marabillosa contorna do río Ladra, esta actividade prolongarase ata ben entrada a tarde.

A partires da unha a Asociación Cultural Bolboreta Fiandeira comezará a demostración de fiado de lá e liño, ademais da demostración de canto e música tradicional. A festa estará garantida durante a sesión vermú grazas ao grupo de música tradicional Pingarela, compoñentes do grupo Os Minhotos, gracias ao programa Musiqueando pola Provincia de Lugo da Área de Cultura da Deputación de Lugo. Xa pola tarde, ademais dos paseos en canoa e as demostracións de fiado, a partir das cinco, comezará o V Aberto de Billarda e a partir das seis a actuación de Desastronauts co seu espectáculo Aínda máis alto, circo con aéreos, trapecios e aros de lume. Agardemos que sexa un bo día para pasar coa familia a carón do río, xantando e compartindo sobremesa nunha zona que conta con tódolos servizos, nun entorno de ribeira perfectamente acondicionado e coidado, onde se pode gozar dun baño, xantar nalgunha das mesas ou mesmo no campo e pasear á beira do río ao tempo que participamos nas distintas actividades.

Pola tarde, a partir das sete e media, abrirán o festival o grupo de música tradicional Habelas hainas desde Compostela, catro mulleres bravas que saben facer festa e reivindicación. Logo sairá ao escenario o inclasificable, O Leo i Arremecághona, rock, punk, teatro e subversión. E para rematar, Tanto Nos Ten, un dos grupos más festeiros do panorama da música tradicional, ideais para dar peche a este quinta edición do 27373.

Queremos agradecer a axuda económica da Deputación de Lugo, sen ela sería imposible facer este festival. Ao Concello de Begonte pola axuda económica e infraestruturas. Ao Club Fluvial de Begonte por prestar as súas marabillosas instalacións. Ás empresas e organizacións colaboradoras, Non Estreses, Cervexa Artesá Aloumiña, Castro & Castro. Tamén a todas aquelas asociacións culturais, artesáns, músicos que vaian vir ao festival e, por suposto, agradecer a presenza de todas as persoas que se acheguen ata Begonte a pasar un día cheo de actividades culturais nun entorno incomparable.

O cartel, de novo ideado polo deseñador gráfico de Begonte, Marcos Vigo ao que queremos agradecer de novo a súa colaboración.

27373_2016_web

Advertisements

Actos: Visita á Cervexeira Doménicus de Lugo (só para soci@s)

Desde hai máis ou menos un ano, Alfredo Domene comezou a súa andaina na fabricación de cervexa artesá en Lugo. A cervexeira elabora tres estilos, a Doménicus Rubia (Blonde Ale de 5º), Domémicus Original (English pale Ale de 5º) e a Domémicus Especial (IPA de 6º).

Nesta visita veremos como se fai unha cervexa artesá paso a paso, a infraestrutura necesaria para a elaboración e o proceso para montar unha empresa deste tipo.

Esta colaboración xurdiu na Cata de Cervexas artesás deste ano á que Alfredo acudiu e na que amablemente se ofreceu a ensinarnos a súa Cervexería Doménicus. Dado que o seu local non é moi grande, decidimos que esta visita fose exclusiva para socios e socias de Castiñeiro Milenario.

A visita será o xoves 28 de xullo. Quedamos ás sete da tarde no seu local situado na Rúa Estaca de Bares, nº 11 ás sete da tarde. Hai que apuntarse antes do mércores 27 nas canles habituais, chamando ao 616705174 ou no noso correo electrónico castineiromilenario@hotmail.com.

Agradecemos a Alfredo a súa total disposición e o seu ofrecemento para realizar esta interesante visita.

Visita_Domenicus

Xornadas Micolóxicas de Verán

Un ano máis volvemos coas sorprendentes Xornadas Micolóxicas de verán. Os vindeiros días 24 e 25 de xuño seguiremos a aprender dos cogomelos nesta época do ano tan pouco asociada aos cogomelos, pero como sabemos de anos anteriores é unha magnífica oportunidade para saír ao monte e gozar das boas temperaturas, da fermosura da fraga e, por suposto, aprender, identificar e/ou recoller os cogomelos típicos destas datas.

A actividade comezará o venres 24 ás 19:00 horas cunha fascinante charla a cargo de José Castro da Sociedade Micolóxica Lucus, que tratará sobre o marabilloso mundo dos fungos e curiosidades micolóxicas. O sábado, a partires das dez da mañá, saída ao campo para identificar e recoller cogomelos, que serán degustados nunha comida a partir das 14:30.

Para @s soci@s de Castiñeiro Milenario e da Sociedade Micolóxica Lucus, o curso será de balde, mentres que para @s non soci@s o custe será total será de 10 euros.

O lugar das charlas e a saída será no local da Asociación de veciñ@s do Castro que, como sempre, colabora de xeito desinteresado con Castiñeiro Milenario. Tamén agradecer a colaboración da Sociedade Micolóxica Lucus e a disposición absoluta de José Castro.

A data límite para apuntarse é o mércores 22 de xuño e podes facelo polas canles habituais de Castiñeiro Milenario, este mesmo blogue, no Facebook, no twitter, no noso contacto ou chamando ao 616 705174.

 

xornadas micoloxicas_web

Actos: Obradoiro de multipercusión tradicional

Castiñeiro Milenario ven de colaborar coa Asociación de Gaiteir@s Galeg@s e a Área de Cultura da Deputación de Lugo para poder traer a Begonte o Obradoiro de multipercusión tradicional que vai a impartir Xosé Lois Romero.

O obradoiro consistirá nun achegamento á percusión tradicional con todo tipo de instrumentos percusivos. Desde as tradicionais pandeiretas, pandeiras ou pandeiros ata esa chamada percusión miúda con tarrañolas, culleres, cunchas, chaves ou tixolas. O mestre de cerimonias será o grande Xosé Lois Romero, un dos referentes máis destacados do panorama da música tradicional galega, agora na teima titánica de darlle un novo pulo á percusión tradicional. O obradoiro será o sábado 23 de abril de 18 a 21 horas. Dado que é unha actividade da AGG hai que apuntarse no teléfono da asociación, o 982 229 966. As prazas son limitadas.

Acompañando a esta actividade, Castiñeiro Milenario organizará unha foliada para rematar a xornada como se merece. De dita foliada iremos informando en vindeiras datas.

Un par de exemplos do bo facer de Xosé Lois Romero, o primeiro con Kepa Junquera e o segundo coa Blue Devils Big Band.

CartazObradoiroMultipercusionTradicional2016-01

 

 

 

Actos: Lucecús Teatro con “A verdadeira historia do poeta Manuel de Paderna”

Este sábado 2 de Abril ás 17:30 horas terá lugar a representación da obra “A verdadeira historia do poeta Manuel de Paderna” polo grupo Lucecús Teatro no local da Asociación Veciñal do Castro (Begonte).
A partir de textos do poeta Manuel María, os Lucecús van construír a curiosa e divertida historia desta máxico personaxe, o poeta Manuel de Paderna. Un home posuído por un enfeitizo poético que dominaba a palabra dun xeito que facía parar as augas dos ríos, variar a situación dos mares, abrollar as fontes ou curar as persoas. Hai quen di que mesmo o paxaros suspendían o seu voo e ficaban inmóbiles no aire para aprender o seu canto e melodía.

Esta representación chega a Begonte dentro da programación dos Seráns Culturais da Área de Cultura da Deputación de Lugo.

Como sempre, queremos agradecer á Asociación Veciñal do Castro a súa disposición para poder levar esta obra ao seu local social.

lucecus

Actos: II Obradoiro práctico de elaboración de cervexa artesá

A cervexa artesá está crecendo a un ritmo imparable e cada vez son máis as empresas galegas que están producindo cervexa artesá de moita calidade. Do mesmo xeito, cada vez son máis a persoas que queren facer cervexa na súa casa, xa que o proceso de elaboración non é demasiado complexo e os resultados soen ser satisfactorios, case desde o principio.
Por ese motivo desde Castiñeiro Milenario queremos repetir a experiencia e organizar un segundo Obradoiro para elaborar cervexa artesá na casa. Para explicar todo o proceso desde o principio, contaremos coa presenza de Alberto Curiel de Cervexas Aloumiña. Alberto ten unha gran experiencia tanto desde o punto de vista empresarial como didáctico, pois foi quen de converter unha afección nunha idea empresarial, polo que coñece o proceso desde que o facía na súa casa ata agora que o fai a unha escala maior.
O obradoiro consta de dúas xornadas durante o mes de marzo. A primeira o día 12, desde as dez da mañá ata as sete da tarde, e a segunda o 19, nesta ocasión so pola mañá. Despois destes dous días teremos os coñecementos básicos para poder facer a nosa propia cervexa na nosa casa.

As prazas son limitadas e por estrito orde de inscrición que rematará o día 8 de marzo. A inscrición, como sempre, pódese facer a través do noso enderezo electrónico (castineiromilenario@hotmail.com) ou chamando ao 616705174. O custe para soci@s é de 40€ e para non soci@s de 50€, o prezo inclúe material teórico, os elementos necesarios para facer a cervexa e, por suposto, unhas botellas da cervexa elaborada no obradoiro para probar na casa.
cartaz_cervexa_web

Anterior Entradas máis antigas

%d bloggers like this: