I Ciclo de Cine Galego

Presentamos a primeira edición do Ciclo de Cine Galego de Castiñeiro Milenario, un novo proxecto da asociación que pretende facer visible algunhas propostas audiovisuais que poucas veces chegan ao gran público e que, por suposto, non chegan ao noso concello. Un Ciclo que vai intentar traer historias galegas, cun fondo calado social e coa intención de xerar e propoñer debates ao redor delas.
Neste primeiro achegamento, contaremos con catro historias ben variadas: a música tradicional no mar, a operación Carioca e a súa trama de prostitución e corrupción, a etnografía na parroquia dos Vilares ou a recuperación da memoria histórica a través dun guerrilleiro antifranquista.

Apagamos as luces, abrimos a cortina e preparámonos para ver estas catro historias galegas.

Dos Gaiteiros do Mar

A primeira cita co Ciclo de Cine foi a proxección do mediometraxe documental de Xurxo Souto e Martín Rodas titulado “Dos Gaiteiros do Mar” e narra a historia de Manuel Sotelo, “Manoliño de Donón”, que sempre quixo ser gaiteiro. Aos dezaoito anos estivo a piques de cumprir o seu soño, tocar no palco do Carnaval do Hío, “o Carnaval do Gaiteiro”. Pero xusto unha semana antes tivo que ir ao mar. Embarcou entón cara Namibia. Ao longo da súa vida profesional pescou, ou sexa tocou, tamén en Uruguai, Terranova ou nas Malvinas. E mesmo nunha marea do ano 74,con dous compañeiros do Morrazo, Manuel Martínez Santomé e Feliciano de Donón, chegou a gravar un “long play”, en cinta casete, abordo do pesqueiro Ría de Aldán, titulado “Nos mares do Gran Sol”. Agora, xa xubilado, corenta anos despois vai cumprir o seu soño de mocidade. Co seu compañeiro de entón, Lito de Pinténs – que tamén andou ao mar, e triunfou en Terranova- vai actuar nun dos palcos do Carnaval do Hío. Grazas a eles convertido no Carnaval dos Gaiteiros do Mar!
A película proxectouse na Foliada de Inverno de 2019. Agradecemos a Borneira Audiovisual e a Xurxo Souto a súa disposición para facilitar a proxección deste filme e a Mónica Fernández da Asociación de Gaiteir@s Galeg@s polas xestións.
Data de proxección: 9 de marzo ás 19:15
Lugar: Casa do pobo do Castro, amablemente cedido pola Asociación Veciñal do Castro.

Benvidas ao Club

A finais de 2009 a aparentemente tranquila cidade de Lugo encabeza titulares e abre telexornais. Algunhas palabras que antes soaban lonxanas resoan coa forza do cotiá entre estradas e beirarrúas escuras baixo as luces intermitentes dos neóns. O maior sumario contra a trata visto en España dáse a coñecer aos medios logo dun ano de instrución baixo segredo de sumario. A operación Carioca entra nos fogares e pasa a formar parte das nosas conversas pero, somos conscientes do que realmente agocha?
Esta é unha viaxe ao inferno onde centos de mulleres son vítimas da corrupción e da violencia, unha viaxe salpicada polas drogas e que ten lugar a carón noso. Logo de 10 anos no subconsciente colectivo este xuízo está a piques de chegar á recta final onde policías locais e nacionais, gardas civís, funcionarios, empresarios ou médicos conforman un entramado que ocupa miles de folios no Xulgado de Instrución nº 1 de Lugo.
A mediometraxe, con licenza Creative Commons, foi dirixido pola artista lucense Carmen PG Granxeiro á que agradecemos a súa total disposición para a proxección deste filme no noso Ciclo de Cine.
Data de proxección: 13 de abril ás 19:00. Ao remate do filme haberá un pequeno debate sobre a película e a operación Carioca.
Lugar: Casa da Cultura de Begonte.

Entrar aos Vilares

Tres rapaces reciben o encargo de realizar un documental sobre a parroquia chairega dos Vilares. Son a primeira xeración non nacida na aldea. Nin son de alí, nin a coñecen. Entran nos Vilares guiados polo que contan os veciños e a curiosidade. Sacan as súas propias conclusións. Eles e as xentes vilaregas son os protagonistas da historia.
O filme é un encargo da asociación Lareira de Soños e foi dirixido por Cibrán Tenreiro, finalista en 3 categorías (mellor filme, mellor filme galego e premio do público) na #12MICE Mostra Internacional de Cinema Etnográfico. Agradecemos á Asociación chairega Lareira de Soños, a súa implicación absoluta para levar a cabo esta proxección.
Data de proxección: 4 de maio ás 19:00. Ao remate do filme haberá un pequeno debate sobre a película con membros da Asociación Lareira de Soños.
Lugar: Casa da Cultura de Begonte.

Camilo. O Último Guerrilleiro

Documental que expón a vida de Camilo de Dios, o último guerrilleiro que queda vivo en Galicia. A través da súa historia pretendemos recuperar a memoria histórica da guerrilla antifranquista: loitador da memoria e historia viva, Camilo é a única testemuña que pode dar voz a tantas e tantos que, coma el, arriscárono todo pola xustiza e a liberdade.
Dirixe, Alba Sánchez, axudada por tres rapaces, Juan Pirola, Miguel García, Pedro Iglesias, que os de Castiñeiro coñecemos ben tralo seu paso polo noso Festival 27373, co nome de Ezetaerre. Agrademos a axuda e disposición de todo o equipo do filme para poder proxectar a súa película neste ciclo de cine en Begonte.
Data de proxección: 25 de maio ás 19:00.
Lugar: Casa da Cultura de Begonte.

Deixamos o cartaz do I Ciclo de Cine Galego, deseñado por Brais García.

Advertisements

Hemeroteca: 6º Festival de Teatro

Fotos: Xogo Revolto de Trécola

A derradeira das representacións do 6º Festival de Teatro tróuxonos á compañía de Teatro de Marionetas Trécola e a súa obra “Xogo revolto”, unha reflexión sobre o acoso escolar. Por primeira vez, o festival de teatro reuníu á rapazada dos colexios de Begonte e Baamonde para gozar desta representación. Agradecemos a gran disposición dos dous colexios para participar desta xornada de teatro e ogallá sexa a primeira dunha chea de accións conxuntas.
Deixamos algunha foto desta gran xornada.

Fotos: A Mariña Teatro en Begonte

Deixamos unhas fotos do paso da Compañía de Teatro A Mariña na súa representación, “Ti es único” dentro do programa Buxiganga da Deputación de Lugo. Unha obra contra o acoso escolar, chea de emoción e que deixou ao público encantado, polo gran traballo dos monitores e, sobre todo, desas marabillosas actrices e actores.

A_Mariña-6

A_Mariña-8

A_Mariña-11

A_Mariña-12

O resto de fotos podes velas no noso álbum de A Mariña Teatro 2018 en Flickr

6º Festival de Teatro

Presentamos a 6ª edición do Festival de Teatro de Begonte. Nesta ocasión contaremos con tres representacións.

Alentía Teatro coa obra, “Manancial de Fantasía“.

Cando: Sábado, 22 de setembro, ás 18:00 horas.
Onde: Na casa do pobo da Asociación Veciñal do Castro.

Grupo de Teatro, A Mariña, coa obra, “Eres ínico: Teatro contra o bullying“.

Cando: Sábado 20 de Outubro ás 19:00 horas.
Onde: Casa da Cultura de Begonte

Marionetas Trécola coa representación de “Xogo Revolto“.

Non temos a data definitiva desta actuación. Iremos informando.

Todas as representacións son de balde

Dúas das obras están dentro do programa Buxiganga da Deputación de Lugo ao que hai que agradecer que siga apostando polo teatro na provincia. Tamén agradecer ao Concello de Begonte a cesión da Casa da Cultura e, por suposto, á Asociación Veciñal do Castro, que sempre colabora con nos neste tipo de actividades.

7ª Edición do festival 27373 de música en galego

Toda a información na páxina do Festival, Festival de día e Festival de noite.

Anterior Entradas máis antigas

%d bloggers like this: