Actos: Visita á Cervexeira Doménicus de Lugo (só para soci@s)

Desde hai máis ou menos un ano, Alfredo Domene comezou a súa andaina na fabricación de cervexa artesá en Lugo. A cervexeira elabora tres estilos, a Doménicus Rubia (Blonde Ale de 5º), Domémicus Original (English pale Ale de 5º) e a Domémicus Especial (IPA de 6º).

Nesta visita veremos como se fai unha cervexa artesá paso a paso, a infraestrutura necesaria para a elaboración e o proceso para montar unha empresa deste tipo.

Esta colaboración xurdiu na Cata de Cervexas artesás deste ano á que Alfredo acudiu e na que amablemente se ofreceu a ensinarnos a súa Cervexería Doménicus. Dado que o seu local non é moi grande, decidimos que esta visita fose exclusiva para socios e socias de Castiñeiro Milenario.

A visita será o xoves 28 de xullo. Quedamos ás sete da tarde no seu local situado na Rúa Estaca de Bares, nº 11 ás sete da tarde. Hai que apuntarse antes do mércores 27 nas canles habituais, chamando ao 616705174 ou no noso correo electrónico castineiromilenario@hotmail.com.

Agradecemos a Alfredo a súa total disposición e o seu ofrecemento para realizar esta interesante visita.

Visita_Domenicus

Actos: II Obradoiro práctico de elaboración de cervexa artesá

A cervexa artesá está crecendo a un ritmo imparable e cada vez son máis as empresas galegas que están producindo cervexa artesá de moita calidade. Do mesmo xeito, cada vez son máis a persoas que queren facer cervexa na súa casa, xa que o proceso de elaboración non é demasiado complexo e os resultados soen ser satisfactorios, case desde o principio.
Por ese motivo desde Castiñeiro Milenario queremos repetir a experiencia e organizar un segundo Obradoiro para elaborar cervexa artesá na casa. Para explicar todo o proceso desde o principio, contaremos coa presenza de Alberto Curiel de Cervexas Aloumiña. Alberto ten unha gran experiencia tanto desde o punto de vista empresarial como didáctico, pois foi quen de converter unha afección nunha idea empresarial, polo que coñece o proceso desde que o facía na súa casa ata agora que o fai a unha escala maior.
O obradoiro consta de dúas xornadas durante o mes de marzo. A primeira o día 12, desde as dez da mañá ata as sete da tarde, e a segunda o 19, nesta ocasión so pola mañá. Despois destes dous días teremos os coñecementos básicos para poder facer a nosa propia cervexa na nosa casa.

As prazas son limitadas e por estrito orde de inscrición que rematará o día 8 de marzo. A inscrición, como sempre, pódese facer a través do noso enderezo electrónico (castineiromilenario@hotmail.com) ou chamando ao 616705174. O custe para soci@s é de 40€ e para non soci@s de 50€, o prezo inclúe material teórico, os elementos necesarios para facer a cervexa e, por suposto, unhas botellas da cervexa elaborada no obradoiro para probar na casa.
cartaz_cervexa_web

Actos: Cata de Cervexas artesás galegas

Á xente que lle presta unha cervexa da boa ten unha cita ineludible o venres 22 de xaneiro en Begonte. Ás nove da noite, na Taberna do Labrego en Pacios (Begonte, Lugo), comezaremos a segunda Cata de Cervexas artesás galegas organizada por Castiñeiro Milenario.

Como na ocasión anterior, teremos con nós a Juan Fernández, experto e referencia no panorama galego da cervexa artesá e responsable dun dos templos cervexeiros de Galicia, a Cervezoteca Malte na Coruña. El vai ser o encargado de escoller catro cervexas galegas (máis unha sorpresa) e de facer unha cata comentada de cada unha delas. Podemos asegurar que é un auténtico pracer para os sentidos probar as cervexas cos acertados comentarios de Juan. Ademais cada cervexa levará cadansúa tapa, ideada e elaborada expresamente para realzar os sabores e aromas propios de cada unha.  O responsable desta maridaxe vai ser José Ángel Corral, persoa moi inqueda e que aborda a gastronomía desde moi diferentes puntos de vista e que dirixe a Taberna do Labrego, local de referencia na Terra Chá. Podemos asegurar, tamén, que na pasada edición a maridaxe coas cervexas foi espectacular tanto no apartado organoléptico como no aspecto visual.

O número de prazas é limitado, por rigorosa orde de inscrición, que se pode facer ben chamando ao 616 70 5174 ou ben no correo electrónico habitual, castineiromilenario@hotmail.com. O prezo para socixs do Castiñeiro é de 20 euros e para non socixs de 25.

cartaz_cata_web

Hemeroteca: Cata de cervexas galegas artesás

Artigo publicado no Progreso, sección A Chaira, sobre a Cata de cervexas artesás galegas que organizou Castiñeiro Milenario en colaboración coa Cervezoteca Malte da Coruña e o Restaurante Rural A Taberna do Labrego de Pacios (Begonte).

OProgreso_Cata

Cata de cervexas galegas artesás

Despois do éxito do primeiro Obradoiro de elaboración de cervexa artesá, nesta ocasión imos facer a primeira cata de cervexas artesás galegas.
Para esta cata imos contar coa presenza de Juan Fernández da Cervezoteca Malte da Coruña, unha persoa que fixo da súa paixón, o seu traballo e que transmite como ninguén ese amor pola cervexa nunhas catas comentadas en directo.
Tamén colabora con nós, José Ángel Corral, propietario da Taberna do labrego en Pacios (Begonte), primeiro restaurante da Terra Chá en recibir a prestixiosa Q de Calidade. O seu local será o encargado da maridaxe das cervexas e no seu salón faremos a cata.
Na sombra e, en parte culpable de argallar todo isto, Alberto Curiel de Cervexa Aloumiña, co que seguimos artellando cousas, sempre moi interesantes.

A cata vai consistir na degustación de seis cervexas, algunhas en rigorosa exclusiva, acompañadas na súa correspondente tapa, feitas especialmente para esta ocasión. Cervexas de moi diferentes estilos (Kölsch, Biere de Garde, Rye IPA, Ale, Abbey Quadrupel e Coffee Stout) para poder apreciar a grande variedade de sabores e aromas que poden ter as cervexas.

cervexas

A cata será o venres 14 do Novembro a partires das nove da noite na Taberna do Labrego en Pacios. O prezo para soci@s será de vinte euros e para non soci@s de 25 euros. A inscrición por rigoroso orde de chegada poderá facerse ata o xoves 13 a través das canles habituais de Castiñeiro Milenario, este mesmo blogue, no Facebook, no twitter, no noso contacto ou chamando ao 616 705174.

Cartaz_Cata_web

Fotos: Obradoiro de elaboración de cervexa artesá

Agora que estamos a piques de probar a cervexa elaborada durante o obradoiro imos lembrar un curso que levantou bastante expectación e que foi unha ocasión magnífica para iniciarmos no apaixonante mundo da elaboración de cervexa caseira, grazas, todo hai que dicilo, a excelente labor de Alberto Curiel, responsable de Cervexa Aloumiña, e Pablo Ferreiros, responsable da cervexa caseira Píntega.





Podes ver tódalas fotos no seguinte álbum na nosa conta de Flickr: “Elaboración cervexa artesá

Anterior Entradas máis antigas

%d bloggers like this: