Vídeos da Foliada de Outono

Deixámos uns cantos vídeos dunha noite chea de música, baile e diversión. Agradecer a toda a xente que se achegou desde diferentes puntos, incluso de fóra da provincia, ata Begonte para gozar dunha magnífica xuntanza onde brilou a nosa música tradicional moi ben defendida por todos os músicos e bailador*s.

  • A rapazada de Tirapadiante da Escola Músico Crisanto de Rábade-Begonte.

 

  • Eudemónicas.

 

  • Eudemónicas e Rebeca Tallón no obradoiro de baile.

 

  • Foliada aberta

 

Foliada de Outono

Vaise acabando este ano 2014. Un ano no que tivemos moitas e variadas ofertas culturais. Desde actividades para coñecer a cultura cervexeira ou os cogomelos tan abondosos nas nosas fragas e piñeirais, ata a recuperación de tradicións case esquecidas como os maios ou a lembranza da nosa marabillosa tradición musical con obradoiros e foliadas. E, por suposto, o ciclo de teatro ou a nosa actividade estrela, o Festival 27373.
Así que para ir rematando, desde Castiñeiro Milenario propoñemos unha foliada por todo o alto o sábado, trece de decembro a partir das nove da noite no local da AV do Castro en Begonte.

Unha foliada na que contaremos coa rapazada de Tirapadiante de Rábade, vencellados á escola Músico Crisanto de Rábade-Begonte. Un conxunto de músicos moi novos con gañas de seguir a transmitir a nosa música tradicional con enerxía e calidade, tendo un futuro moi prometedor.
E por outra banda, teremos un grupo xa consagrado, cunhas integrantes que levan moitos anos na defensa no noso patrimonio musical e que neste último proxecto están a acadar o apoio incondicional d*s seguidor*s das músicas tradicionais. As Eudemónicas e o eudemónico de Pablo Pintor, virán a presentar o seu último espectáculo no que xuntan a música galega co baile tradicional, xa que virán acompañadas de Rebeca Tallón que impartirá un obradoiro de baile.
E para seguir a festa, remataremos cunha foliada aberta.

Como noutras ocasións queremos agradecer a disposición e colaboración incondicional da Asociación Veciñal do Castro que nos volven a ceder ás súas instalacións para esta foliada de outono.

Cartaz_Foliada_web

%d bloggers like this: