Fotos: Foliada de Inverno

Moi interesante ese primeiro achegamento a un instrumento realmente incrible como é a zanfona. Ese xirar a roda sen parar e esa caixa de resonancia que é o noso corpo, foi toda unha experiencia, moi ben guiada polo mestre Óscar Fernández que nos levou por esa marabillosa viaxe polo mundo da zanfona.
Despois gozamos cunha das mellores foliadas que tivemos no Castro, así que hai que agradecer aos grupos e “espontáneos” que viñeron a agasallar coa súa música. Moitas grazas aos Foliadeir@s do Castro, A Treboada, a Gaia Pandereter*s e aos Amigos do Caldeiro. Grazas a tamén a todas as persoas (grandes e pequenas) que botaron unha man para que a cousa saíra o mellor posible, incluso neses momentos de pánico nos que pensabamos que as cousas se nos escapaban das mans. Grazas aos bailadores e bailadoras, porque as foliadas sen el@s son moito menos divertidas. Por suposto, agradecer a Asociación Veciñal do Castro, por todo.
Aí van algunhas das fotos desta Foliada de Inverno.

Obradoiro de Zanfona e Foliada de Inverno 2017

Obradoiro de Zanfona e Foliada de Inverno 2017

Obradoiro de Zanfona e Foliada de Inverno 2017

Obradoiro de Zanfona e Foliada de Inverno 2017

Obradoiro de Zanfona e Foliada de Inverno 2017

Podes ver o álbum completo da Foliada de Inverno no noso Flickr.

Hemeroteca: Foliada de Inverno

A repercusión, nos medios de comunicación, do obradoiro de zanfona e da Foliada de Inverno, artigos que foron aparecendo nos xornais destes últimos días.

El Progreso, 5/3/2017

La Voz de Galicia, 7/3/2017

El Progreso, especial A Chaira, 7/3/2017

Actos: Foliada de Inverno

¿Que estamos en inverno? ¿Chove e vai frío? Nada mellor para entrar en calor que o lume da festa e da música tradicional.

O próximo 11 de marzo retomamos as actividades culturais deste 2017, cunha gran festa da música tradicional. Pola tarde contaremos cun obradoiro de zanfona impartido polo mestre Óscar Fernández (Os Cempés, bOnOvO), toda unha referencia da música tradicional e músico capaz de levar á zanfona a territorios pouco explorados. O obradoiro terá unha duración de catro horas e vai dirixido a persoas que non teñen coñecemento algún do instrumento e queren facer unha primeira aproximación a un instrumento realmente incrible. As prazas están limitadísimas a nove, pois esas son as zanfonas que amablemente cede o Padroado de Cultura do Concello de Narón, polo que non é necesario traer zanfona. O prezo para asociad*s de Castiñeiro Milenario é de 25€ e para non asociad*s de 35€. Para apuntarse podes chamar ao 616 705174 ou no correo electrónico da asociación (castineiromilenario@hotmail.com) e as prazas serán concedidas por rigoroso orde de inscrición.

Ao rematar o obradoiro teremos uns petiscos e despois comezaremos a foliada cos seguintes grupos: Foliadeir*s do Castro de Begonte, Treboada de Rábade, Os amigos do Caldeiro e Gaia pandereteir*s de Castro Ribeiras de Lea. Agradecemos profundamente a disposición de todos os grupos que veñen a agasallar a súa música e facer unha grande festa galega. Ao rematar os grupos, Foliada aberta.

Como sempre, agradecemos á Asociación Veciñal do Castro que nos deixen o seu local para facer a festa, ao Padroado de Cultura de Narón polo “préstamo” da zanfonas e aos grupos que participan nesta Foliada de Inverno.

cartaz_foliada_web

Fotos: Concerto de Quempallou

Rematamos o verán coa actuación do grupo Quempallou. Agradecermos á Deputación de Lugo as facilidades para poder traer ao grupo dentro do programa Verán Cultural 2016 e ao Concello de Begonte polas infraestruturas para que a xornada musical saíra o mellor posible.
Deixamos algunhas das fotos, o resto podes velo no noso álbum en Flickr: Quempallou en Baamonde.

Quempallou-12

Quempallou-11

Quempallou-7

Verán Cultural 2016: Quempallou

Quempallou é unha das referencias fundamentais no panorama da música tradicional e folc de Galicia nos últimos vinte anos. Formados no ano 1999 con integrantes da zona da montaña lucense e das rías baixas, montaña e mar, O Incio e Bueu misturando xeitos de tocar e de ver a nosa música tradicional. A formación foi, no seu momento, toda unha revolución, xuntando as gañas de facer festa, co compromiso social; capaces de encher o torreiro cunhas letras cargadas de intencións. Na actualidade Quempallou está formado por Roi Maceda, no acordeón; Guillerme Ignacio, na gaitas, frautas e voz; Isaac Millán, no bouzouki e guitarras; Roi Adrio, nas percusións e Rubén Trotiño nas gaitas e clarinete.

Teñen sacado cinco discos ao mercado, Quempallou (2002); Estremonías (2004), disco fundamental na historia recente na nosa música tradicional; Polo Aire! (2007); o recompilatorio Once anos mallando (2010); Vellas Novas (2012) e o novedoso xeito de sacar traballo discográfico por partes e sen formato físico, os famosos Quarteiróns 1 (2015) e 2 (2016).

O concerto está programado para as 23 horas do venres 23 de setembro na Praza de Baamonde e está incluído dentro do Verán Cultural 2016 da Deputación de Lugo, á que queremos agradecer a súa disposición para traer ao grupo ata Begonte e ao Concello por facilitar as estruturas necesarias para o evento.

Só queda berrar un longo LUUUUMEEEE!!  e veña festa.

quempallou_web

 

 

Actos: Festival 27373

A V edición do Festival 27373 de Begonte, reúne nun mesmo día, un festival para nenos e nenas durante a mañá e a tarde e concertos para os mozos e mozas pola noite

 A Asociación Cultural Castiñeiro Milenario de Begonte vai organizar a Quinta edición do Festival 27373 que terá lugar o sábado 13 de agosto no Club Fluvial de Begonte que presta as súas instalacións para a celebración deste festival.

O Festival está dividido en dúas partes. Polo día, a programación vai dirixida aos máis pequen@s. A partires das 12:00 comezamos coas actividades deportivas que estarán a cargo da empresa de Begonte Non Estreses, que vai ofrecer paseos en canoa pola marabillosa contorna do río Ladra, esta actividade prolongarase ata ben entrada a tarde.

A partires da unha a Asociación Cultural Bolboreta Fiandeira comezará a demostración de fiado de lá e liño, ademais da demostración de canto e música tradicional. A festa estará garantida durante a sesión vermú grazas ao grupo de música tradicional Pingarela, compoñentes do grupo Os Minhotos, gracias ao programa Musiqueando pola Provincia de Lugo da Área de Cultura da Deputación de Lugo. Xa pola tarde, ademais dos paseos en canoa e as demostracións de fiado, a partir das cinco, comezará o V Aberto de Billarda e a partir das seis a actuación de Desastronauts co seu espectáculo Aínda máis alto, circo con aéreos, trapecios e aros de lume. Agardemos que sexa un bo día para pasar coa familia a carón do río, xantando e compartindo sobremesa nunha zona que conta con tódolos servizos, nun entorno de ribeira perfectamente acondicionado e coidado, onde se pode gozar dun baño, xantar nalgunha das mesas ou mesmo no campo e pasear á beira do río ao tempo que participamos nas distintas actividades.

Pola tarde, a partir das sete e media, abrirán o festival o grupo de música tradicional Habelas hainas desde Compostela, catro mulleres bravas que saben facer festa e reivindicación. Logo sairá ao escenario o inclasificable, O Leo i Arremecághona, rock, punk, teatro e subversión. E para rematar, Tanto Nos Ten, un dos grupos más festeiros do panorama da música tradicional, ideais para dar peche a este quinta edición do 27373.

Queremos agradecer a axuda económica da Deputación de Lugo, sen ela sería imposible facer este festival. Ao Concello de Begonte pola axuda económica e infraestruturas. Ao Club Fluvial de Begonte por prestar as súas marabillosas instalacións. Ás empresas e organizacións colaboradoras, Non Estreses, Cervexa Artesá Aloumiña, Castro & Castro. Tamén a todas aquelas asociacións culturais, artesáns, músicos que vaian vir ao festival e, por suposto, agradecer a presenza de todas as persoas que se acheguen ata Begonte a pasar un día cheo de actividades culturais nun entorno incomparable.

O cartel, de novo ideado polo deseñador gráfico de Begonte, Marcos Vigo ao que queremos agradecer de novo a súa colaboración.

27373_2016_web

Anterior Entradas máis antigas

%d bloggers like this: