Foliada de Outono 2018

Pois xa está aquí unha nova edición das Foliadas de Outono de Castiñeiro Milenario, como sempre na Casa do Pobo da Asociación Veciñal do Castro (Begonte)

Como sempre, comezaremos a xornada foliadeira cun tempo adicado á aprendizaxe da música tradicional. Nesta ocasión propoñemos un obradoiro de bombo que impartirá Miguel Anxo López “Chino”, recoñecido percusionista na escena da música tradicional, director da banda de gaitas Sons da Chaira e mestre na escola de Rábade, Begonte e Outeiro de Rei. Ademais forma parte de bastantes proxectos musicais, como Efecto Polilla, Acibreira ou Pepe Vaamonde Grupo. O obradoiro empezará ás 19:30 e terá unha duración aproximada de 90 minutos. Para @s asociad@s de Castiñeiro Milenario será de balde e un custe de 10€ para os non asociad@s. É preciso apuntarse se queres asistir e podes facelo enviando un correo a castineiromilenario@hotmail.com ou chamando ao 616705174.

Despois do tempo de formación, pasaremos aos petiscos para repoñer forzas e dar paso aos momentos festeiros coa foliada propiamente dita, que empezará a partir das 21:30, aproximadamente. Nesta ocasión estamos especialmente orgullosos da presenza dos dous primeiros grupos: Os Miñocas e os Airiños da Terra Chá, pois moitos dos seus integrantes teñen unha estreita relación coa nosa asociación. Así que abrirán a foliada, dirixidos polo gran Brais Monxardín, os nenos e nenas do grupo de música tradicional da escola de Rábade, Begonte e Outeiro de Rei, que viñeron a chamarse Os Miñocas e despois collerán o testemuño o grupo de veteran@s da mesma escola, Os Airiños da Terra Chá; para rematar por todo o alto, os marabillosos cantareiros de Trevellos que porán peche á foliada oficial. Ao remate da súa intervención, comezará a foliada aberta.

Como sempre, agradecer aos grupos que participan na foliada a súa presenza, a Miguel Anxo polas facilidades postas para desenvolver o obradoiro, a Brais Monxardín polo seu empeño para que a escola de Rábade, Begonte e Outeiro de Rei estivera nesta foliada e, por último, á Asociación Veciñal do Castro por deixarnos empregar ás súas instalacións da Casa do Pobo.

Advertisements

Celebrando o Samaín

Este ano desde Castiñeiro Milenario queremos celebrar o Samaín e para iso imos facer un percorrido por Baamonde e Pacios o 31 de outubro e facelo como nos presta, cantando por algúns dos bares da contorna. Para iso, ademais de afinar a nosas gorxas e os nosos instrumentos, debemos acompañarnos coa indumentaria axeitada para a ocasión. A idea é que vaiamos de negro, as mulleres, pano na cabeza, como se fose de loito; os homes, igualmente de negro. Tamén se pode ir de túnica negra ou similar.
O lugar de saída será no Restaurante Galicia, ás oito da tarde para ir visitar algúns doa bares de Baamonde e logo ir ata Pacios. O desprazamento entre bar e bar farase en procesión entoando unha cantiga ben arrepiante.
¡Ollo o 31 non te colla a Santa Compaña!!

Actos: Foliada de primavera e Maios 2018

Semella que ao fin chegou a primavera, e en Castiñeiro Milenario queremos darlle a benvida que merece, organizando unha nova edición da Foliada de Primavera.

Comezaremos pola tarde cunha merenda para a cativada, chocolate e biscoito para coller forzas e ir apañar flores e fentos e xestas para facer un maio ben bonito e grande. Dirixidos polas sabias indicacións de Branca Villares faremos un maio, probaremos a facer algún “maio vivo” e cantaremos unhas pezas ao redor do maio, nenos, nenas e maiores todas xuntas para dar a benvida á primavera.

Despois haberá uns petiscos para empezar unha nova edición da Foliada de Primavera. A partir das nove, comezará a festa o grupo residente, Foliadeir@s do Castro, nesta ocasión moi ben acompañado pola Asociación A Legua Dereita desde O Corgo, As Cernellas de Santa María de Bóveda e para rematar, Troupelear desde Baralla. Ao remate, foliada aberta ata que os corpos aguanten.

Agradecemos, como sempre, a boa disposición dos grupos para participar neste acto festivo, a Branca Villares pola axuda e á Asociación Veciñal do Castro por cedernos o local para facer esta gran festa da primavera.

Actos: Obradoiro de percusión do Sur de Italia e concerto didáctico de Brigan (Italia)

Estamos encantad@s e orgullos@s de poder contar de novo co grupo italiano, Brigan nunha das nosas actividades. Máis aínda, cando veñen de xira española presentando o seu novo disco, Rúa San Giacomo, facendo parada na Coruña, Compostela, Madrid, Barcelona… e Begonte.

Brigan xurde no ano 2009, desde o seu inicio tiveron un grande interese pola música celta, reflectido nun primeiro disco que adicaron en exclusiva a este xénero musical. O proxecto madurou intentando misturar os sons célticos coa sonoridade da música tradicional do Sur de Italia. O seu terceiro traballo, Trasumanza Sonora, recolle o traballo de investigación e estudo dos repertorios tradicionais das músicas do arco atlántico, Bretaña, Irlanda, Asturias e Galicia coa mistura do xeito de tocar e interpretar do Sur de Italia.

Brigan está composto por Francesco Di Cristofaro: voz, acordeón, gaitas alistana, sanabresa e galega, zampogna, pito pastoril, tin e low whistle, sisco de Giugliano, mandolina e bouzouki; Ivan del Vecchio: guitarra clásica, guitarra acústica, guitarra de 12 cordas, mandoloncello; Gabriele Tinto: coros, birimbao, pandeiretas, pandeiro cadrado, pandeiro de Peñaparda, tamburelli, tammorra, castañolas, vieiras, morteiro, bombo, pratiños, caixa redobrante, zambomba e Simone Lombardi: coros, botella de anís, tambor, pezuños de cabra, bombo.

brigan

Na xornada do 17 de febreiro teremos unha cita ineludible na Casa do Pobo do Castro (Begonte, Lugo) para poder gozar con Brigan de dous xeitos ben diferentes.
Ás 18 horas, comezaremos cun Obradoiro de Percusión do Sur de Italia que se vai centrar nunha introdución relacionada co aspecto histórico/cultural dos instrumentos tradicionais, desde a súa orixe ata a actualidade e, unha segunda parte, adicada á técnica básica de tammorra e tamburello. Vanse analizar e practicar algúns dos ritmos tradicionais daquelas terras como a Tarantella, a Tammurriata ou a Pizzica. A duración será de aproximadamente dúas horas e media. A inscrición, obrigatoria, podes facela a través do noso correo electrónico (castineiromilenario@hotmail.com) ou no teléfono 616705174. O prezo será de 10€ para *s soci*s de Castiñeiro e de 15 para as persoas que non sexan asociadas.
Despois dun pequeno descanso, ás 20:45, o grupo Brigan, fará un pequeno concerto acústico amosando a súa música. Durante unha media hora poderemos gozar dos ritmos tradicionais italianos e ibéricos nunha oportunidade única. O concerto estará aberto ao público en xeral e será de balde.

Despois destes interesantes eventos, poderemos repoñer forzas cuns petiscos, xusto antes de rematar unha xornada inesquecible de música tradicional en Begonte coa Foliada de Inverno da que falaremos nos vindeiros días.

Todas as actividades serán na Casa do Pobo do Castro (Begonte, Lugo), agradecemos moito que a Asociación Veciñal do Castro nos deixe as instalacións para facer todas estas actividades.

Fotos: Cantos de Nadal

Velaí van unhas cantas fotos do noso precorrido por algúns dos locais de Pacios e Baamonde facendo os Cantos de Nadal (e algún profano). Grazas ao Muíño de Pacios e ao Madia Leva de Baamonde por deixarnos botar uns berros e, especialmente, á Taberna do Labrego e ao Galicia que, por riba de aturarnos, aínda deron o aguinaldo.

Cantos de Nadal 2017

Cantos de Nadal 2017

Cantos de Nadal 2017

Cantos de Nadal 2017

Podes ver o resto das fotos no álbum Cantos de Nadal 2017 na nosa conta en Flickr.

Anterior Entradas máis antigas

%d bloggers like this: