Fotos: Pre-estrea do Agasallo de Anya

Esta semana vai a definitiva. O 17 de Maio a compañía Trécola vai estrear no Museo Provincial de Lugo a adaptación da novela de Sabela Núñez Singala, “O Agasallo de Anya“. Por sorte, nós tivemos o privilexio de gozar da obra o pasado día do libro. Unha honra que contaran con nós para facer unha actuación previa a esa grande estrea en Lugo.

Aí van algunhas das fotos do evento.

Pre estrea do Agasallo de Anya

Pre estrea do Agasallo de Anya

Pre estrea do Agasallo de Anya

Pre estrea do Agasallo de Anya

Podes ver todas as fotos no álbum Pre estrea “O Agasallo de Anya” en Flickr.

Teatro: Pre-estrea de “O Agasallo de Anya”

Como dícía o grande Galeano, “Moita xente pequena, en lugares pequenos, facendo cousas pequenas, poden cambiar o mundo“. Isto ben se podía a aplicar á autora que hoxe nos ocupa, Sabela Núñez Singala, profesora, activista, escritora e loitadora. Dun proxecto pequeno chamado Mochiliña de cores, seguiulle outro, chamado Cestiña de cores, un xeito de involucrar a moita xente para levar axuda de xeito directo ata un orfanato de Ucraína. Desa historia vital e preciosa, xurde unha novela infantil que nos achega á realidade de dúas nenas, Xiana que é galega e ten once anos e Anya, unha cativa ucraína desa mesma idade. “O agasallo de Anya” é xa un referente da literatura para xoves en galego.

E por outra banda temos ao grupo de monicreques Trécola de Pol, co que tivemos a grande fortuna de coincidir unhas cantas veces. O seu último proxecto é levar a escena esa obra de Sabela ao teatro de monicreques, un reto que comezaron desde cero, coa creación dos monicreques, os decorados e a adaptación da historia a ese teatro tan complicado. De novo, xente pequena, de lugares pequenos, facendo cousas pequenas para tentar de cambiar o mundo.

O resultado desde binomio fantástico é a obra O agasallo de Anya para teatro de monicreques que acaba de ser pre estreada en Muimenta, a localidade onde vive a autora. Grazas a petición expresa da compañía teatral o seguinte lugar de preestrea é o Concello de Begonte, en concreto, no local da AV do Castro. Non se nos ocorre mellor xeito de celebrar o día do libro que participando na creación dunha pequena biblioteca, dun lugar pequeno e compartir con todos vós a pre estrea de O Agasallo de Anya da compañía Trécola…e nós estamos absolutamente encantad@s.

.

Fotos: Trécola con Tolitates

Moi divertida a representación dos compañeiros de Trécola que fixeron as delicias da xente cativa co seu cambio constante de historias e personaxes.
Aquí deixamos unha fotiñas do seu paso polo IV Festival de Teatro de Begonte.

Trécola no IV Festival de Teatro de Begonte

Trécola no IV Festival de Teatro de Begonte

Trécola no IV Festival de Teatro de Begonte

O resto de fotos podes vela no noso álbum Trécola, Tolitates.

4º Ciclo de Teatro

Un ano máis coa arribada do outono, chega o Ciclo de Teatro de Castiñeiro Milenario. Desta volta contaremos con catro actuacións.

Hipócrita Teatro representará a súa obra “Emperador, que pensas? Fala!“.

Sinopse: O imperio romano está en decadencia e o emperador Galerio ven refuxiarse á afastada cidade de Lucus Augusti. Entre as súas robustas murallas, Galerio séntese a salvo. Pero unha estraña enfermidade, unha esposa ambiciosa, un anfitrión que quizabes non é o que aparenta, unha filla caprichosa… perturban a súa tranquilidade. O inimigo sempre está máis preto do que un sospeita.

Cando: 18:00. 17/09/2016

Onde: Casa da Cultura de Begonte.

Comedia. Todos os públicos.

Debulla Escénika mostrará a súa obra, “Perversóns“.

Sinopse: Érase unha vez o ser humán, que non se atopaba nin a si mesmo nin nos demáis. Tropezaba cós outros, infectado pola tiranía do seu ego nun mundo traumado de cal uniformada. Esa doenza da alma, case tan antiga como a mesma especie, converteu ós humanos en individuos controlados e manipulados, en depredadores na procura do poder e da satisfacción dos intereses persoais alimentados pola proveitosa incultura.

Cando: 20:00. 01/10/2016

Onde: Casa da Cultura de Begonte.

Crítica social. Adultos.

debulla

Trécola chegará co seu novo espectáculo, recén saído do forno, titulado “Tolitates“.

Sinopse: Dous paiasos e un obxectivo: lograr a risa do público dende o principio ata o final de cada representación. Maxia, teatro de obxetos, música, malabares,…

Cando: 18:00. 15/10/2016

Onde: Local AV do Castro.

Familiar.

marionetas-trecola-tolitates

Daboapipa chegará coa súa obra “Contos e lerias“.

Sinopse: Unha viaxe polos montes, prados e camiños máis verdes que puideramos ver, chea de encontros cos animais máis marabillosos: toupas choscas, chivos enormes e ogros torpes,
pombas doces e dragóns atroces, bechos estraños, cabalos azuis e cantigas de fai anos e non tantos…

Cando: 18:00. 22/10/2016

Onde: Local AV do Castro.

Familiar.

Aí vai o cartaz completo do IV Ciclo de Teatro de Begonte.

teatro_2016web

Foliada do Oito en Begonte

Desde que o colectivo Oito máis que foliadas decidira espallar as Foliadas do Oito fora da cidade de Lugo, tiñamos claro que esta festa debía pasar por Begonte. Así que, despois de Baralla e Vilalba, tócalle a quenda ao noso concello. O próximo sábado dous de maio, temos unha cita imperdible no Restaurante San Martín de Carral, que moi amablemente cede as súas instalacións.

A xornada comezará con actividades para os máis cativos, sobre as seis da tarde cos xogos populares a cargo da Asociación Cultural POLKA Pol Kultura Aberta e teatro de monicreques da Compañía Trécola. A continuación, sobre as sete, contaremos cunha charla-obradoiro a cargo do artesán, Sito Carracedo sobre a construción de palletas e afinación da gaita.

Despois destas actividades, poderemos repoñer forzas grazas aos petiscos do Restaurante San Martín. Sobre as nove comezará a foliada oficial coa presentación en exclusiva mundial dos nosos Foliadeir@s do Castro, tanto na versión miúda como na versión adulta. Unha presentación da que a Asociación Castiñeiro Milenario síntese especialmente orgullosa, porque desde o ano 2007 levamos loitando por ter un grupo de música tradicional. Agardemos que esta cita serva como o empurrón definitivo. Despois do grupo local, tocarán a rapazada de Rábade de Tirapadiante, que xa teñen colaborado connosco, as Cantareiras de Pol e para rematar a AC Penas de Rodas. Despois da foliada oficial, comezará a foliada aberta e a festa ata ben entrada a noitiña.

Desde Castiñeiro Milenario queremos agradecer a tódalas asociacións, grupos e artesáns que veñen á Foliada do Oito de xeito totalmente desinteresado. A Oito máis que foliadas por ese traballo impagable que fan pola difusión da nosa cultura e ao Restaurante San Martín que cede as súas instalacións e os petiscos de balde. Agardamos que a festa sexa inesquecible.

 

11 foliada do oito

O Restaurante San Martín atópase na parroquia de Carral, no concello de Begonte en plena N-VI. Podes ver a súa localización na seguinte ligazón.

%d bloggers like this: